自摸雙辣(香港第一個女性棟篤笑)

世界上有乜嘢「經」係最多人擁有？
聖經？
非也！
佛經？
非也！
馬經？
非也！
是月經，全世界的女人都有。
九八年夏天，忽然接到鍾慧冰電話，說她和苑瓊丹想搞一個棟篤笑，希望我能替她們寫一些劇本。初聽這個意念，有點愕然，因為棟篤笑似乎是男性世界，香港從來未有試過有女藝人搞棟篤笑，況且鍾慧冰的形象並非特別搞笑，與苑仔合作，想像不出會有甚麼火花。心底十五十六，充滿疑慮。

為了寫好這個劇本，連續和鍾慧冰、苑瓊丹談了三個月，話題全圍繞著女性在生活上所遇到的喜怒哀樂，如月經、處女膜、更年期、生仔、結婚、離婚、相夫、教子、二奶、偷情、墮胎……。

三個月下來，發覺女人可寫的東西絕不比男人少，女人的煩惱絕對比男人更多。有了好的題材，動起筆來得心應手，經過兩個月的修修改改，終於寫成了全香港第一個女性棟篤笑。

鍾慧冰和苑仔的演繹相當出色，演出十分成功，證明女人也可以棟篤笑。

「雙辣妹」全長兩個多小時，有十多個環節，這裡我節錄了其中五段，包括開場篇、減肥篇、生仔教仔篇，以及兩齣短劇：強姦篇與報案篇。


（一）開場篇 - 女人最厲害的武器 [人：鍾慧冰（冰）, 苑瓊丹（苑）]

冰：吖！點解月經叫大姨媽，唔叫大姨丈？

苑：因為姨媽係女人，姨丈係男人。女人比男人麻煩，所以大姨媽即係大麻煩。***

苑：女人最厲害嘅武器係乜？

冰：眼淚。

苑：唔係，係大姨媽！即使遇到色魔，你話大姨媽嚟比嗌警察嚟有用得多。

冰：所以大姨媽係女人嘅救星，男人嘅剋星！***

冰：女人身上有一樣嘢，同男人結婚嘅時候一定會穿。

苑：處女膜。

冰：唔係，係女人嘅真實年齡。

苑：眼角膜同處女膜有乜分別？

冰：一個嚮明，一個嚮暗。

苑：唔係，眼角膜可以捐贈畀任何人；處女膜只能俾男人捐。***

冰：處女膜同熊貓有乜相同嘅地方？

苑：都係咁人見人愛。

冰：唔係，都係越嚟越難搵。

冰：你幾多歲冇咗處女膜？

苑：十二歲。

冰：嘩！犯法嗰喎！邊個經手㗎？

苑：佢唔係人嚟㗎！

冰：吓！唔係呀！咁！佢係乜呀！

苑：鳳凰牌單車。***

苑：戀愛真係奇妙，可以將一對陌生人變得咁親密。

冰：婚姻重奇妙，可以將一對親密嘅人變成陌生人。***

苑：你要用幾耐時間去觀察一個男人適唔適合你呢？

冰：大概三個月，你呢？

苑：大概三十秒。

冰：嘩！三十秒可以觀察乜呀？

苑：觀察吓佢嘅銀行存摺囉。***

苑：你愛一個男人，會為佢做番啲乜呢？

冰：為佢生個仔囉。

苑：如果你憎一個男人，又點呢？

冰：為佢生個仔囉，不過係同第二個男人生。***

冰：對於女人嚟講，三十歲前嘅婚姻係一種商品。

苑：咁三十歲之後嘅婚姻呢？

冰：係贈品囉。***

冰：你前嗰排去學時裝呀？

苑：係呀，因為男人鍾意識著衫嘅女人。

冰：咁畢業未呀？

苑：停咗學咯。

冰：點解呀？

苑：因為我發現，男人其實係鍾意識除衫嘅女人。***

苑：睇你又重咗，真係要做多啲運動減吓肥啦。

冰：有呀，前嗰排我日日去騎馬做運動。

苑：有無減到呀？

冰：有！減咗十二磅。

苑：唔覺嘅。

冰：係隻馬呀嘛！


（二）減肥篇 - 十大酷刑 [主講：鍾慧冰]

肥！的確係女人最大嘅敵人。

世人譏笑克林頓，唔係因為佢搞婚外情，而係佢咁冇Taste，去搞個成二百磅嘅「肥」溫斯基。根據統計，女人一生裡面，幾乎用咗一半時間，同大半嘅金錢去對付「肥」呢個敵人！

肥！真係好可怕。

以前我o係馬路截順風車，揚吓手，至多一分鐘就有車停低，真係可以套用一句：人見人愛，車見車載。但後來我發覺，體重每增加一磅，我截車嘅時間就會增加一分鐘。

而我最近截車的紀錄係五十八分鐘，本來五十八分鐘我都唔介意，我最覺得羞恥嘅係嗰架車係垃圾車。

重有，以前我o係街通常都會遇到啲星探，搵我拍戲、拍廣告。雖然，依家都有唔少人搵我拍廣告。但係多數係叫我拍減肥產品嘅廣告，我係負責做減肥前嘅Model。

肥！重有一樣慘，就係連二手明星衫都買唔到。

小姐，呢度無你Size喎，你留低個聯絡電話，第日等阿肥姐嗰啲衫出嚟賣嘅時候就通知你啦！

我決定要減肥。

近十八年嚟，地球上所有嘅減肥方法我都試過晒。唔理係乜，只要有「減肥」兩個字，我都拚埋條「肥命」去試。甚麼減肥茶、減肥丸、減肥餐、減肥衫、天堂式減肥、地獄式減肥、計劃減肥、古惑減肥……通殺，以我嘅減肥經驗，絕對可以同曾志偉合作主持一個超級無敵減肥人，主題曲我都諗咗。

（做動作）

Onemore，Twomore，

做人哋老婆，要做揀手貨，

寧願冇乜波，千祈咪脂肪多，

如果脂肪多，親戚都比較疏，

電梯遇色魔，剝衫都冇人摸。

Threemore，Fourmore，

肥婆，Super。

我試過吳君如嘅狂飲水瘦身法，一日飲二十杯水。點知水腫卻未瘦過，我諗呢個方法都係流嘢。如果咁堅，佢個老友俞琤就唔駛搞到幾乎連商台個門都入唔到。

我又試過著減肥內衣。花姐都成半世紅人，著住嚟賣廣告，應凸嘅好凸，應凹嘅幾凹，於是我買咗套，買嗰日我已經瘦咗成磅，因為件嘢成萬銀，肉赤到冇乜胃口。

呢件咁嘅騎呢嘢，一套四件：一個胸圍、一條收腹褲、一個腰封、一條內褲。

著一次就勞師動眾，要搵埋老公同賓妹幫手，因為佢嘅原理同人人搬屋差唔多，將一舊舊肉團，由一個地方，搬去另一個地方。

著嗰陣，首先彎低身，拉高條褲，等大脾啲脂肪拉番晒上去，然後，推晒胸側啲肉向前，搞一次要搞成個鐘，而且二十四小時唔准除，除咗之後又嘔又屙，我老公話，呢種減肥方法，如果放喺清朝，可以列滿清十大酷刑之一。

後來我有試過梅小惠嘅推脂減肥法，推脂另一個意思，係推走你嘅資產。因為推一次好貴。

計算嘅方法同買樓一樣，按平方呎計，而且唔同部位，有唔同價錢。

面部：每呎五千

肚腩：每呎四千七

大脾：每呎六千二

手臂：每呎七千三

屁股：每呎萬六

乳房：每呎萬八

嘩！呢兩度貴咁多？

梗係啦！屁股同乳房屬於山頂區貴重地皮。豪宅嚟喎，用料梗係要正啲。

如果大家冇咁多錢，我可以介紹個唔駛錢嘅方法，就係問肥姐借欣兒嘅相放喺雪櫃。

每當你一打開雪櫃攞嘢食，一見到欣兒，嘩！你就唔敢點食嘢。


（三）生仔教仔篇 - 入名校全攻略 [主講：鍾慧冰]

生仔嘅過程，係先快樂，後痛苦，但上帝好偏心，男人就享晒快樂，女人就哽晒痛苦。男人冇生過仔，想像唔到生仔有幾痛。生仔有幾痛？就好似你中咗三千八百萬六合彩頭獎，但搵唔番張飛咁痛，真係痛到入心入肺，想死，呢種痛苦，一世人一次都難頂，所以女人幾咁偉大，我哋一生人裡面，可以唔見好多張飛。點解女人咁頂得痛？因為喺仔女身上，佢哋睇到兩個字，就係——希望。你話唔覺意，生到個嘉誠、兆基、甜甜，就幾多個三千八百萬都返嚟啦！所以好多女人為咗買保險，就用大包圍攻勢，生夠十零廿個，希望梗有一個中。

每個老母都想望子成龍，就算做唔到成龍，至少都要做狄龍。每個老母都好緊張同仔女搵學校，最好搵間有名人讀過嘅，第日個仔同人講，吹水博士都係我校友，幾威呀！

望子成龍，係每個母親嘅心願，即使做唔到成龍，至低限度要做狄龍。所以依家嘅阿媽，好重視仔女嘅教育，我有個女友，佢有咗五個月咋，就已經請補習先生番嚟對住個肚教個胎讀書，呢個叫做胎教喎。胎教呢樣嘢真係有㗎，好似我個女，聞到乜嘢煙味都咳嘅，係特醇萬寶路冇事。因為我陀個女嘅時候，係食呢隻煙嘛。所以我大肚嗰陣，我老公好緊張，唔准我睇恐怖片，驚嚇親個女，唔准我同黃霑傾咁多偈，因為驚個女一出世就識問候我。

依家嘅阿媽緊張啲仔女係有原因，嗱！我先問你幾個題目。

第十四任港督係邊個？

「十年生死兩茫茫」係邊個詩人寫嘅？

阿根庭嘅首都叫乜名？

布政司嘅英文點串？

答得晒嘅，我請你去宵夜。

以上嘅題目，唔係港姐嘅題目，原來係一啲小一入學試嘅試題。

香港人做生意好叻，捉到為人父母嘅心理，開辦咗好多小一入學模擬面試課程，教啲細路點樣對答。

費用一向都唔平，幾分鐘就收幾千蚊，貴過見李柱銘呀。

人哋收咁貴，梗係有料到。

名校最重要係睇你嘅家庭狀況。

——小朋友，你住邊度呀？

——大坑東木屋區。

——你爹哋做乜？

——喺地盤做擔泥，依家失業。

——頭先搭乜嘢車嚟學校？

——搭巴士，冇冷氣嗰隻。

——咁邊個養屋企？

——攞政府綜援。

嗱！咁答，就唔駛旨意合格。要用另一種答法就唔同。

——小朋友，你住喺邊度呀？

——又一村對面。

——你爹哋做乜？

——佢同李嘉誠合作發展地產，不過最近政府唔賣地，暫時停止發展。

——頭先搭乜嘢車嚟學校？

——我由司機送我嚟嘅。

——咁邊個養屋企？

——我哋阿公剩落好多錢，我哋唔駛做都奉旨有得分。

嗱！同一件事，唔同講法就爭好遠，個仔入到名牌小學，先有機會入名牌中學，先有機會入名牌大學。

最好搵間有諾貝爾名人讀過嘅。第日個仔同人講，吹水博士都係我校友，幾威呀。

不過香港咁多學校，點揀好呢？咁就要睇你想個仔將來做邊行啦。

如果做政客就九龍華仁，李柱銘讀過；如果想做大官就皇仁，許淇安讀過；如果想做明星就喇沙，李小龍讀過；如果想做大富豪就赤柱，張子強讀過。

現代嘅女性掛住教仔，往往忽略咗另一個仔，就係你身邊個老公仔。

——老婆，你知唔知聽日係乜嘢日子？

——我知，個仔英文測驗同數學小考。

——唔係呀！係我哋結婚七周年！

——吖！時間過得真係快，睇嚟，都要同個仔搵定間中學。

——今晚我想……

——你瞓先啦！我重要同個仔背書，你都唔想個仔第日好似你咁冇出色，做人咁失敗！

——我做人最失敗就係娶著你！

好多家庭悲劇就係咁發生。

我有個姊妹喊咁口嚟搵我，佢話佢老公今日一起身竟然匆匆忙忙放低幾千蚊喺床頭，重講咗句好震撼嘅說話：呢啲係你嘅家用。

我話：可能佢真係想畀啲家用你呢。

姊妹話：至弊佢擺低嘅係人民幣呢！

婚外情係現代社會最嚴重嘅家庭問題，可大可小。

小可導致破裂感情，大可導致傾國傾城。

你睇美國克仔同肥溫單嘢，就幾乎搞到總統都冇得做。

嗰份乜鬼史塔報告喺美國賣到斷市。

香港有人出咗中文版，聽講好賣過《夜遊人》，樓下報攤強仔話，呢本書好多師奶買，我諗啲師奶買嘅目的只係得兩種：第一，係睇吓男人點去搞婚外情；第二，係參考啲女人點去偷情。

男人出去搞婚外情，唔會喺額頭鑿個字，美國人花咗幾千萬先至令克仔認有偷食，一般家庭婦女邊有咁多錢吖！

不過，凡係偷食嘅男人，唔多唔少都會有啲心理壓力，會令到佢哋嚮啲生活小節上有啲異常反應，只要我哋多啲觀察，就好容易睇得出。

第一，個老公啲普通話無端端叻咗，而且有幾句講得特別標準：

——幾點鐘下班？

——你是甚麼地方人？

——放工來接你。

——下星期我會再來。

第二，唱卡拉OK時，個老公開始唔唱四大天王啲歌，而係唱大陸歌星嘅歌，又或者識唱一兩段革命樣板戲歌。

第三，每個月嘅手提電話忽然多咗好多，因為根據統計，老公同情婦講電話嘅時間比同老婆講電話嘅時間長六倍。

好似我老公同我講電話，頂多五句：喂！唔！唔！好！係咁！

第四，洗錢開始慳咗，以前買開一卡鑽石戒指嘅，依家就買大減價啲碎鑽，名義上係市道唔好慳啲洗，實際係多咗頭家，要多啲負擔，無辦法唔慳。

最近有議員大聲疾呼，要政府立例打擊「二奶」，好似打擊翻版影碟咁嚴打！但係我覺得冇用，一件貨品有冇銷路，最終係由消費者決定。

雖然翻版影碟同二奶都係唔合法，都唔係正版貨，但係二奶比翻版影碟優勝得多。起碼外形fit過正版，包裝好過正版，畫面靚過正版，音質靚過正版。

所以香港啲男人，不惜長途跋涉，搭幾個鐘頭火車，喺羅湖海關好似「大地恩情」咁迫法，咁辛苦都要返大陸搵「翻版」。唉！作為「名門正版」嘅大婆，實在有需要自己反省一下，要杜絕翻版，首先要由改善「正版」嘅質素做起。


（四）報案篇 - 女人的手袋 [苑瓊丹（苑）：飾演女警, 鍾慧冰（冰）：飾演濃妝艷抹風塵女子]

（苑坐定，冰氣沖沖入）

冰：Madam，Madam，我嚟報案。

苑：乜事呀？俾人強姦呀？

冰：我都想，我唔見咗個手袋。

苑：手袋啫，駛乜咁緊張。

冰：你鋪話法呀，女人有一半嘅生命財產係放嚮手袋裡面㗎，唔見咗個手袋，即係唔見咗半條命呀Madam。

苑：有冇咁誇張？

冰：我問你，賊佬搶女人嘢最多搶乜？

苑：搶手袋。

冰：夜總會啲麻甩佬帶小姐出街，媽咪會叫小姐做乜？

苑：拎手袋。

冰：咁政府班女高官搞咗個黨，叫做乜嘢黨？

苑：手袋黨。

冰：咁咪係囉，手袋對女人嚟講幾重要。

苑：得啦，得啦，而家叫你嚟同我玩《超級無敵掌門人》呀？「手袋黨，搶手袋，拎手袋……」，坐低，等我同你錄口供，叫乜名？

冰：董建華。

苑：乜話？唔好玩喎。

冰：我發誓，我真係同佢同名同姓，Madam，不過我係女版董建華。

苑：唔怪得啲手袋都唔肯跟你啦，幾多歲？

冰：屬……雞。

苑：即係幾多歲？

冰：二十九。

苑：做乜嘢職業？

冰：碧麗湖嘅專業脊柱神經骨科醫療護理技師。

苑：即係乜呀？

冰：簡單講，即係按摩師。

苑：簡單講，即係揼骨妹，個手袋喺邊度唔見？

冰：頭先坐的士留低。

苑：記唔記得車牌號碼？

冰：唔記得。

苑：㗎車有乜特徵？

冰：㗎車係紅色，梳化係黑色，個頂係銀色，有「的士」兩個字，車入面有個司機，條友聽緊粵曲，個錶一開始跳十五蚊……。

苑：得啦，得啦，咁你個袋係乜牌子呀？

冰：LV。

苑：名牌喎，幾多錢？

冰：八十八蚊，嚮花園街買嘅，買兩個有八折㗎。

苑：唔見咗幾多錢？

冰：二百零蚊港紙，四百五十蚊人民幣，六十蚊美金，三百蚊台幣，兩萬幾YEN，重有幾十蚊英鎊。

苑：嘩！你開找換店，咁多外幣嘅？

冰：Madam，我哋呢行，每日都有唔少遊客幫襯，做得啲客happy，咪有些少貼士囉。今日咪少囉，做得嗰六隻客，其實香港嗰九百幾億外匯儲備，我哋班姊妹都有幫手搵番嚟㗎，點知搵搵埋埋，唔夠幾日，就俾嗰兩隻嘢散咗千幾億，跟住重捧住堆爛紙當寶咁話長線投資，雖然兩樣都係紙，我就冇乜學識啦，不過我寧願攬實啲銀紙。

苑：得啦，叫你講今日財經咩？重有乜呀？

冰：重有二十張劉德華閃卡。

苑：你係劉德華Fans？

冰：我係郭富城Fans。

苑：咁點解你又有咁多劉德華閃卡？

冰：聽信和啲妹妹仔講，依家嘅行情，二十張劉德華閃卡可以換一張郭富城大海報，遲啲重可以炒到三十張。

苑：你咁叻睇行情，不如去炒股票，炒閃卡！重有呢？

冰：係啦，有六張信用卡。

苑：六張咁多，你好多嘢簽呀？

冰：對唔住，咁耐我一張都未簽過。

苑：吓，咁你又申請？

冰：唓，我去啲姊妹屋企，見到呢度有渣打電話，嗰度有恆生蒸籠，第一太平Hi-Fi，永亨坐地燈，港基電飯煲，又唔駛交年費喎，用得唔好嘥，梗係去申請啦，我而家成屋企嘅電器，都係信用卡送㗎。

苑：估唔到你哋又幾醒目喎，重有冇呀？

冰：重有一盒日語會話。

苑：揼骨揼到你咁都算好學，想去日本發展呀？

冰：梗係唔係啦，我學日文，係練習嚟lum男人。

苑：學日文可以lum男人？

冰：你有冇發現，日本女人講嘢待別嗲。

（講一兩句日文……也咩爹）

苑：呢幾句咁熟嘅。

冰：日本三級片成日聽啦。

苑：咁同日文有咩關係？

冰：因為日文嘅字母發音特別姣，特別嗲，我懷疑發明日文嗰個一定係女人，而且重係o係床上面發明嘅，Madam，見你咁好相與，醒你啦。

苑：好呀。

冰：嗱，日文有五十個字母，不過剩係學識頭五個音，就已經夠用啦。

苑：點讀呢？

冰：五個音就係「啊」，「咦」，「嗚」，「Air」，「呵」。

苑：（跟讀）「啊」，「咦」，「嗚」，「Air」，「呵」。

冰：係咁讀唔叫lum仔聲，係叫林仔聲。

苑：咁應該點讀呢？

冰：讀呢幾個字，要用身體語言去配合嘅。第一，要全身放軟，好似冇晒骨頭咁——啊。第二，瞳孔收縮，微絲細眼——咦。第三，聲線要慢，要輕——嗚。第四，適當拉長少少音——Air。第五，加少少天真、無知——呵。

冰：再嚟一次。

苑：（跟做一次）「啊」，「咦」，「嗚」，「Air」，「呵」。

冰：唔，重喺撐少少，跟我做多次，下面啲女士，有興趣一齊做，啊——

苑：（跟做）啊。

冰：咦。

苑：咦。

冰：嗚。

苑：嗚。

冰：Air。

苑：Air。

冰：呵。

苑：呵。

冰：（一口氣）啊，咦，嗚，Air，呵。

苑：啊，咦，嗚，Air，呵。

冰：唔，有少少天份，第日想轉行，我介紹啲好客你。嗱，學識發音，跟住要學應對，當你係男人問我。

苑：聽日放咗工，一齊睇戲食飯囉。

冰：啊，想溝我？

苑：你啲肉地好滑溜，今晚好靚。

冰：咦，好衰㗎。

苑：夠唔夠錢洗呀？

冰：嗚（猛搖頭），爭啲啲囉。

苑：今晚陪我，咪返屋企喇。

冰：Air，你抵死。

苑：結婚好唔好？

冰：呵，我太幸福啦！

苑：嘩，果然厲害，我係女人都有啲暈，好啦，手袋重有咩呀，我寫到手軟。

冰：重有兩條青瓜，一條甘筍。

苑：唔係呀嘛，駛唔駛呀？

冰：咪諗邪嘢，青瓜係要嚟美容，甘筍榨嚟飲，清熱氣，你知我哋呢行要保養。

苑：重有呢？

冰：呢樣緊要囉，可能會影響我下半生嘅命運。

苑：乜嘢呀？

冰：亞姐報名表。

苑：你參加亞姐？

冰：乜嘢唔得，我幾多姊妹都參加過，有啲重入到前三名，Madam，不如你做我提名人吖？

苑：我冇你咁得閒，我自己都報咗名。

冰：吓！

苑：咪講咁多，重有啲乜，一口氣講晒佢……

（燈漸暗，冰仍V.O.講）

冰：時裝店九折卡五張，不過有兩間執咗笠。金獅影視會現金套票三十八張，我冇乜時間睇，鍾意就送畀你。安全套半打，好耐冇用，可能過咗期。眼藥水，Panadol，避孕丸，衛生巾，超薄有翼嗰隻。蚊怕水，因為我哋唔著衫嘅時間多過著衫。魚寶鯊魚丸一樽，防止衰老。香口膠一排，因為我有口臭。太陽眼鏡，遮黑眼圈用。電芯兩排，Call機成日冇電。重有捐血卡，婦科醫生卡，周家莊食物禮券，NormaJohnson美容卡，電子記事簿，不過我唔多識用。絲襪一對做後備，指甲油，雪肌蘭粉盒，指甲鉗，唇膏，一包硬盒沙龍煙，香水，福多多食物券，《忽然一周》，《明周》，翻版日劇VCD三隻，維他命A、B、C、D丸，麥鍾文清脂丸一包，咳糖一包，火機，水費單，電費單，衛斯理小說，《朱鎔基傳》……。

後記
某日看到一個女人掉了一個手袋在地上，手袋裡裝的東西超過百件，啟發了這個題材，小小的女人手袋，已包含女人的整個世界。


（五）強姦篇 - 強姦廿一 [主演：鍾慧冰（冰）：飾演女警, 苑瓊丹（苑）：飾演被姦女人]

（苑披頭散髮，衣衫撕爛，但非常鎮定地進入報案室）

苑：Madam！報案呀！

冰：你做乜呀，跳樓呀？撞車呀？打交呀？

苑：我俾人強姦！

冰：你都算鎮定喎。

苑：經驗多啫。

冰：你試過好多次咩？

苑：三次唔知算唔算多？

冰：以你嘅質素，一世人能夠俾人強姦三次算超買㗎啦。

苑：我講嘅三次，係今年。以前嘅我都統計唔計，總之我經驗豐富，如果王晶同我合作，至少可拍到「強姦廿一」。

冰：根據紀錄，你第一次報案。

苑：係呀。

冰：咁你點解以前咁多次都唔報案？

苑：我驚吖嘛。

冰：你驚有人報復？

苑：唔係，我驚自己未夠狀態，身材唔夠fit啫，你知啦！依家啲傳媒，最鍾意就係報道啲強姦案。死９左都大大張相放嚮頭版，何況我生「歐歐」。《今日睇真D》、《城市追擊》一定走唔甩，可能要我親身示範一次案件重演，跟住又會有好多片商搵我拍戲，甚至無線邀請我做《天下無敵掌門人》嘅嘉賓呢。

苑：如果我操得唔fit，唔嚮最佳狀態之下，邊度有信心面對普羅觀眾呢？

冰：咁即係話你依家好fit啦？

苑：（擺幾個誘惑姿態）可以見得吓人啦。

冰：咁你認唔認得強姦你嗰個疑兇嘅樣？

苑：梗係認得啦！見慣見熟。

冰：見慣見熟？

苑：個樣咁多年都冇乜變。

冰：咁你一定知佢叫乜名。

苑：知！叫杜蕾斯，係硬盒包裝，有凸紋超薄嗰款喎。

冰：（吹脹反應）我係問強姦你嗰個人，唔係強姦你嗰個袋。

苑：個人吖嘛，我都認得。

冰：（拿出筆紙）你可唔可以畫出嚟？

（苑畫了一個戴飛虎帽的賊樣）

冰：（吹脹反應）咁佢重有冇其他特徵？

苑：（陶醉地）佢雙眼好似郭富城咁迷人，佢把聲好似張學友咁溫柔，佢有黎明咁高大嘅身材，佢有劉德華咁強健嘅雙臂，佢有成龍咁靈活嘅身手……總之，同我老公完全唔同——

冰：（截住）喂！阿姐！你係俾人強姦定係拍緊AV三級片呀？

苑：咁我照事實講姐。

冰：咁啦！你將整件案件，由頭到尾講一次。

苑：噚晚深夜三點左右，我返屋企搭嘅時候，忽然有一個著住雨褸嘅神秘男人衝入嚟，箍住我……因為我俾人強姦得多，所以個手袋一定會放定一支防狼電棒，於是混亂之中，我喺手袋攞咗支棒出嚟，「隊」向個色魔。吖——

冰：個色魔大叫？

苑：唔係，係我，因為我攞錯咗一支女人自慰用嘅電棒。

冰：（偷笑）……

苑：笑乜啫，我哋女人都需要吖嘛，尤其我哋啲離咗婚嘅單身女人。

冰：貴唔貴？

苑：睇吓你買乜嘢牌子，（滔滔不絕）美國貨就粗啲，價錢平啲；法國貨就細膩啲，價錢貴啲；最貴就意大利貨，款色最多；想平啲可以買香港啲翻版貨……

冰：得啦！得啦！一陣先講呢啲，繼續講番案情。

苑：好彩喺呢個時候，個門打開，我搏命咁走，重一路拍門，希望有人救我。

冰：咁有冇人開門？

苑：有！有個師奶開咗門，好惡死咁話：我都話唔會裝有線電視，你再拍門，我就報警。跟住就「呯」一聲閂埋門。結果，我俾個色魔要脅住，入咗我間屋。

冰：咁當時你間屋重有冇其他人？

苑：有！有個賓妹。佢好合作，一分鐘唔夠就自己搵條繩縛住自己喺牆角，我從來都未見過佢做嘢咁快手，跟住個色魔就推咗我入睡房，想喺睡房郁我。我同個色魔講，可唔可以唔喺睡房，我同我老公離婚嘅原因，就係因為佢太單調、太乏味，十幾年嚟都係嚮睡房做，未換過位置。個色魔都算有啲人性，結果佢拖住我去廚房。啊！太新鮮！從未感受過咁刺激，女人，點都係屬於廚房嘅。

冰：你有冇反抗？

苑：當然有啦！佢郁我嘅時候，我諗起釣魚台，神聖嘅領土，俾人非法進入侵佔，我開始明白點解阿牛佢嘅咁激烈保衛釣魚台。

苑：（高喊口號）保衛釣魚台！保衛釣蝦台！保衛釣蟹台！我狂嗌一輪口號之後，就先嚟一招老漢推車將佢推開，再嚟一招床邊拗席，然後一招觀音坐蓮，將個色魔係咁推、係咁撞。

（苑捉住冰動作狂野）

冰：得啦！得啦！我依家有啲懷疑。究竟係你俾人強姦，定你強姦人？

苑：唔好意思，嗰陣時我實在太興奮……（發覺講錯）唔係，係太憤怒。

冰：我再問你一個問題，個色魔郁你嘅時候，你有冇嗌？

苑：梗係有啦。

冰：你點樣嗌法？

苑：呢啲要記錄嘅咩？

冰：好重要㖭，將來法官會根據呢點嚟判案，你回憶一吓，當時係點嗌？

（苑回憶）

苑：（嗌）你唔好行埋嚟！救命呀！救命呀……救命……救命……救……救……呀……呀……

冰：得啦！得啦！俾你嗌到我周身慶，個色魔大概幾點鐘離開？

苑：深夜四點半左右。

冰：你點記得咁清楚？

苑：因為當時對面個師奶好勞氣咁嗌過嚟：八婆，睇三級片唔好開咁大聲，成四點半，人哋唔駛瞓咩！個色魔聽到有人發現，就匆匆忙忙咁走。

冰：佢有冇留低啲乜嘢證物？

苑：有！

冰：你駛唔駛去醫院檢查一吓？

苑：唔駛啦！我要趕住返屋企，個色魔臨走曾經警告過我，如果我夠膽報警，佢今晚會再嚟搞我，我驚佢摸門釘，俾個賓妹執到，係咁啦！拜拜！

（苑離去）

（冰吹脹反應）